فرانک فرید ایپک
سئوگیلیم
آرتور نرده‌لرین دیبینده دایانیب، قاپیچی‌نی گؤزله‌دی. ایشین شووقوندان تئز دورموشدو بوگون. قیزیشماق ایچون ال‌لرین بیرـ بیرینه سورته‌رک، نرده‌لردن ایچری‌یه گؤز تیکدی. هاچاندان هاچانا کیشی گلیب چاتدی. قاپی‌نین قیفیلین آچیب، آغیر دمیر چرچیوه‌نی چکدی، قاپی یاواش آچیلدی.
آرتور نرده‌لرین دیبینده دایانیب، قاپیچی‌نی گؤزله‌دی. ایشین شووقوندان تئز دورموشدو بوگون. قیزیشماق ایچون ال‌لرین بیرـ بیرینه سورته‌رک، نرده‌لردن ایچری‌یه گؤز تیکدی. هاچاندان هاچانا کیشی گلیب چاتدی. قاپی‌نین قیفیلین آچیب، آغیر دمیر چرچیوه‌نی چکدی، قاپی یاواش آچیلدی.
«گون آیدین آرتور! بوگون نئجه‌سن؟»
«شانس اوسته.»
سئوینجک سوروشدو: «یانی ایشین ایشدی بوگون، هه؟»
«هه، دئییرم به ائله اولا.»
آرتور گولومسه‌دی. قاپیچی دا اوتاغینا قاییتدی. آرتور آستاجا ماشین یولونا یاخینلاشیب، سونرا دایاندی. دونن هاردان قالدیغی یئر یادینا گلمیردی. قاباقکی هوش‌ـ باشی یوخ ایدی. پالتوونون جیبیندن نقشه‌نی چیخاردیب، سونونجو گیره‌‌جگی یوخلادی. جان مکلاود، سپتامبرین ۲۳٫ بوکی اوچ گون قاباغا قاییدیردی؛ یا لیستی‌نی بئله تازالاماغی اونوتموشدو، یا کؤکوندن بو ایشی گؤرموردو.
«آرتور، گایین بیری گایسان لاپ!» دئیه‌رک، چیینلرین آتدی. «داها نئیله‌مک، ائله بو جان مکلاودـ دان باشلامالیام.» نقشه اوزایله یولونو، ایسته‌دیگی یئره کیمی تاپیب، ایشی عیارلادی.
بیر ردیفی قورتاراندان سونرا، اومبالاری باشلادی اویون چیخارتماغا. یاخینداکی نیمکت اوسته اوتورورب، قیچین اوغدو.
«بیرـ ایکی قورتوم ایچکی پیس اولماز.»، دوشوندو. آراخالیغی‌نین دوگمه‌لرین آچیب، قولتوق جیبیندن، یاریم‌ـ بوطرینی چیخارتدی، بیرـ ایکی قورتوم ایچیب، قاپاغین قویدو.
«یاخشی‌سی بو دور کی چوخ ایچمه‌یم، یوخسا یئنه آزارام.» دئدی. سونرا ناهارین آچدی. سئودیگی خورگی ایدی، چؤرک آراسینا قویولموش، خردللی قویون اتی‌ایله سوغان. ساندویچین یئدیکده، اسکی گون‌لرین فیکیرینه دالدی. بعضن اولوردو، اونو آپ‌ـ آشکار آنیمسایا بیلیردی. اوزو دوز خیالینین اؤنونده آیدینلاشیردی؛ باخ، او گؤزلری، اونا گولومسه‌ین دوداق‌لاری. آنجاق سونرا ائله گون‌لر اولوردو کی، چتین‌لیکله، اونو ذهنینه گتیره بیلیردی. یادیندا قالماق اوچون گرک هر زادی یازایدی؛ همیشه اولاسی چتین ایشلردن بیریدی، بو ایش. بیردن قورخو دوشدو جانینا. اونون آدینی اونودموشدو. قورخدوغو ایش، باشینا گلمیشدی.
«نه‌ایدی آدی؟ … اَگنس … اِدنا … ؟ یوخ اولا بیلمز … آلیس …؟» آدلار بیرـ بیری‌نین آردیندان، ذهنیندن اوچوب، کئچیردی؛ هئچ بیری نظرینه دوز گلمه‌دن.
«تانری خئیرینه … بیر آز فیکیرلش …» الین آلنینا چکدی. «اِلیز … اَمندا …»
فایداسی یوخ ایدی. آدی یادینا دوشسون دئیه، تکجه بیر ایش گؤره بیلردی: ایشین دالین توتماق! ناهارین قورتاردی، آیاغا قالخیب، قالدیغی یئره قایتدی.
قارشیسینداکی داشین اوستونه باخدی. ویلیام رنی ۱۹۲۲ـ۱۸۶۷٫
فیکیرلشدی.« یاخشی، بو کی او دئییل.» او سیرانین آردین توتدو. مارگریت فورسایت ۱۹۴۸ـ ۱۸۹۹ . باش داشینا گؤز تیکیدی.
«گؤره‌سن مارگریت ایدی؟ یوخ … اینانمیرام.» باشقاسینا کئچدی و باشقالارینا … ؛ گلیب او سیرانین سونونا چاتدی. یئنه نقشه‌نی چیخاردیب، سونونجو آدی یازدی. فرانک گیلروی ۱۹۵۳ـ۱۹۰۳ ، ۷نجی ردیف، سپتامبرین ۲۶ سی. بئله‌لیکله یئنه باشلادی. سیرالاری، بیر به بیر گزدی، بلکه بیر زادا راست گله، ذهنین ایشه سالا. بونونلا بئله، آدی خاطیرلامادی کی خاطیرلامادی. ایندیه کیمی بیر بئله اوزون زامان اونوتمامیشدی اونون آدینی. بیلمیردی نئیله‌سین. قیچی دینجلسین دئیه، یئنه اوتوردو. نئچه قورتوم ویسکی ایچیب، نقشه‌یه باخدی.
«سگگیز ردیف قورتولدو … ایکی ردیفه‌ده باخسام، بو گونومو گؤرر.» دئدی. آغیر نفس چکیردی. یئریمک؛ حافیظه‌سینی سیخیشدیرماق، اونو لاپ آیاقدان سالیردی. باشقا بیر سیرانی باشلادی. رابرت هیوز ۱۹۷۹ـ ۱۹۰۷٫
قاش قارالماقدایدی.ایشدن دایانماق هاییندا، بیر بالا قبیر داشی‌نین دیبینده دایاندی. یازیلمیشدی:
سئوگیلیم اِدیت
۱۹۴۷ـ ۱۹۰۰
جنت‌ده دینجل
نفسی چیخمیردی. آرخایا آخیندی، سونرا اؤزونو ساخلاشدیردی.
« اِدیت … آدی اِدیت ایدی. اؤزو دور.» فیکیرلشدی، آرتیقلاشا، ایناندی.
«آمان تانری ، اِدیت … سنی تاپدیم.» اَییلدی. الی‌نین دالی‌سین، اونون اوزونه چکدیگی کیمی، داشین اوزه‌رینه چکدی.
«سئوگیلیم … اِدیت! … چوخ چوخدان ایدی سنی آختاریردیم. نئجه قیییردین، کؤمک ائله‌میردین تاپام سنی؟» یاناغین سویوق مرمر داشین اوزه‌رینه قویوب، آغلاماغا باشلادی. دییه‌سن چیین‌لریندن یوک گؤتورولموشدو. بیر بئله ایل‌لر اونسوز سوووشموشدو؛ سونوندا، ایل‌لر اؤنجه الیندن گئتدیگی قادینا اوخشاییردی یئنه‌ده.
مزارینین دؤره‌سینی گؤزدن کئچیردی. هر یانی اوت‌ـ‌علف باسمیشدی. داشین اوزونده قازیلمیش یازی‌لاردا یووسون بیتمیشدی.
«گؤر اؤز باشینا نه گتیریبسن؟» دئدی. «گؤزل بیر سلقه ـ سهمان ایسته‌ییرسن.» اویناق‌لاری‌نین آغریسینا باخمایاراق، بیر دیزی اوسته یئره چؤکوب، اوت‌لاری یولماغا باشلادی.
«اؤزونو گؤر نه یامان کؤکه سالیبسان. منی ایستییرسن سندن موغایات اولام، ائله دئییل؟» اوت‌لاری جیبینه باسیب، داشین دؤره‌سینده قویلانان کیچیک ناخیشلی داشلارین دیبلرینه ییغیلان تورپاق‌لاری، الی‌له سورتمگه چالیشدی. یازی‌لار ایچینده‌کی یووسون‌لاری دیرناق‌لاریله قاشییاـ قاشییا، دیل-دوداغی آراسیندا دئیینیردی. بیردن دایاندی. فیکری گئتدی قاپیچی‌یا. قبیر داشیندان یاپیشیب، اؤزونو آستاجا آیاغا قالدیردی.
«گئتمه‌لییم سئوگیلیم، ساباح یئنه گله‌رم؛ سنه گول ده گتیره‌رم. گؤروم آویز گولو تاپا بیلرم!» بارماق‌لارین اونون آدی‌نین اوزه‌رینه سوروشدوردو. «بیلیرم او گول‌لری نه قدر سئور‌سن.»
«اِدیتیم منیم، ساباح گؤروشه‌ریک.» سس‌سیزجه‌سینه اونا بیر اؤپوجوک یوللادی. گلدیگی یولدان؛ سیرا ایله دوزولموش خاچ‌لارین؛ داشدان یونولموش ملک‌لرین آراسیندان، گیره‌جـَگه ساری یوللاندی. اورا چاتدیقدا، نرده‌لره سؤیکنیب، اؤزونو تاپدی.
«هانسی تاریخده ایدی، گؤره‌سن؟» فیکیرلشدی. «۱۹۴۷٫» شبهه‌لر شئیطان تورو کیمی باشی‌نین دوره‌سینه هؤرولدو.
«اینانمیرام بو تاریخ دوز اولموش اولا … نه زامانیدی؟ … محاریبه‌دن سونرا … بیز دنیستون ـا داشینمیشدیق اوندا. تام‌ین دورد یاشی اولمالی ایدی. گؤرن ۴۷ ایدی؟ یا ۴۸؟» بارماق‌لاریلا حسابلاماغا چالیشارکن، قاپیچی گلدی.
«یاخشی، دئه گؤرَک، بوگون الیوه بیر زاد توخدادی، آرتور؟»
«دئییردیم به توخدادی … آنجاق ایندی اورَگیم قیزیشمیر … ائوه چاتدیغدا بیر زادلاری حسابلامالییام.»
«او دا اولماسا ، نئیله‌مک، بو گونون ساباحی دا وار.»
«هه.»
آرتور مزارلیقدان ائشیگه چیخدی. کیشی اونون دالینجا قاپینی باغلادی، زنجیری
دمیر چرچیوه‌یه دولادی، تاققیلتی‌ایله قیفیلین سالدی.
«ساباح گؤروشه‌ریک، آرتور.» آرتوردان جاواب چیخمادی. اؤزونه جومموشدو.
کیشی اوتاغینا گئری دؤندوکده، دیل-دوداغی آراسیندا دئدی، «بونون دا گونو چاتماقدادیر.»
